फिदिम । पाँचथरको फिदिममा जारी चौथो पाँचथर गोल्डकप फुटवल प्रतियोगिताअन्तर्गत आज भएको खेलमा बागमती युवा फुटवल क्लब सर्लाही विजयी भएको छ ।
टाइब्रेकरमा पथरी–११ फुटवल क्लब मोरङलाई ४–१ गोलअन्तरले पराजीत गर्दै सर्लाही सेमिफाइनलमा प्रवेश गरेको हो । सोमवार फिदिम माध्यमिक विद्यालयको खेलमैदानमा भएको प्रतिस्पर्धात्मक खेलमा दुवै टोलीबाट निर्धारित समयमा गोल हुन नसकेपछि खेलको निर्णय टाइब्रेकरबाट लिइएको थियो ।
टाइब्रेकरमा बागमतीका लागि निर्मल बल, अभि लामा, देवा गुरुङ र अनिल राना मगरले गोल गर्नुभयो । मोरङका भने निरोज परियारको प्रहार मात्रै गोल भएको थियो । मोरङका मञ्जिल खड्का र वडे ग्लोरीको प्रहार सर्लाहीका गोलरक्षक रौनक चौलागाईंले रोक्न सफल हुनुभयो ।
आजको खेलको उत्कृष्ट खेलाडी (म्यान अफ दी म्याच) समेत गोलरक्षक चौलागाईं नै घोषित हुँदै रु. पाँच हजार पुरस्कार प्राप्त गर्नुभयो ।
आजको खेलमा सुटआउट हिरोका लागि भाग्यचिठ्ठामार्फत दुई जना दर्शकले गोल गर्ने अवसर पाएपनि दुवैको प्रहार बाहिरिएको थियो । आज आकर्षक ढङ्गले समर्थन गरी फिदिम नगरपालिका–२ का टेकनाथ काफ्ले फ्यान अफ दी म्याच बन्न सफल हुनुभयो ।
प्रतियोगिताअन्तर्गत भोलि समूह चरणको अन्तिम खेलमा त्रिभुवन आर्मी क्लब र हिल्स फुटवल एकेडेमी भारतवीच प्रतिस्पर्धा हुने आयोजक पाँचथर क्लबका सचिव योगराज सेढाईंले जानकारी दिनुभयो । पाँचथर क्लबले आयोजना गरेको यस प्रतियोगिताको विजेताले रु. पाँच लाख पाँच हजार तथा उपविजेताले रु. दुई लाख ५५ हजार पुरस्कार प्राप्त गर्नेछन् ।
प्रतिक्रिया