यासोक खानेपानीलाई जापानको आर्थिक सहयोग

पाँचथर । पाँचथरको कुम्मायक गाउँपालिकामा संचालित यासोक सुख्खा क्षेत्र तमोर पम्पिङ खानेपानी आयोजनालाई सेवारो निप्पोन ग्रुप जापानले आर्थिक सहयोग गरेको छ । खानेपानी संचालनको दिगोपनाको लागि भन्दै सो सस्थाले ४५ हजार ५५९ रुपैयाँ सहयोग गरेको हो । यासोक सुब्जनी निवासी सस्थाका सदस्य देबेन्द्र लावतीले संयोजनमा पठाएको रकम कुम्मायक–१ वडाअध्यक्ष तथा गाउँपालिका प्रवक्ता देबेन्द्रकुमार लावतीको समन्वयमा उपभोक्ता समितिलाई हस्तान्त्रण गरिएको हो ।

समितिको बिल काउन्टरमा एक कार्यक्रमको आयोजना गरी लावतीले समिति अध्यक्ष मेघराज निरौलालाई रकम हस्तान्त्रण गर्नुभएको थियो । रकम हस्तान्त्रण कार्यक्रममा समितिका अध्यक्ष मेघराज निरौलाले सहयोग रकमले योजना संचालनमा थप राहत मिलेको भन्दै दाताहरुको प्रशंसा गर्नुभएको थियो ।

गाउँपालिकामा खानेपानीको श्रोत नभएपछि तमोर नदिबाट १८७० मिटरको उचाइमा पानी लिफ्ट गरी बितरण हुदै आएको छ । खर्चिलो र महंगो आयोजना भएकाले खानेपानीलाई थप व्यवस्थित रुपमा संचालनको जापानी सस्थाले आर्थिक सहयोग गरेको  लावतीले जानकारी दिनुभयो ।

कुम्मायक गाउँपालिकामा नियमित १ हजार ४७३ घरधुरीले खानेपानी उपभोग गर्दै आएका छन । सुख्खाक्षेत्रका ३ हजार ४३ घरधुरीलाई लक्षित गरी खानेपानी योजना संचालन आएको छ । उपभोक्ताले न्युनतम महसुल ३ सय रुपैयाँ बुझाउदै आएका छन । गाउँपालिकाले पनि योजना संचालनको लागि आर्थिक वर्ष २०८१÷०८२ मा ३५ लाख रुपैयाँ बिनियोजन समेत गरेको लावतीको भनाइ छ ।