सुनचाँदी चोरी गरेको आरोपमा एक जना पक्राउ

सुनसरी । सुनसरीको बराहक्षेत्र नगरपालिका वडा नं. १ चतराका लक्ष्मण विकको सुनचाँदी पसलबाट सुनचाँदी चोरी गरेको आरोपमा एक जना पक्राउ परेका छन् । पक्राउ पर्नेमा सोही स्थानका २६ बर्षीय अनिल बराइली रहेका छन् ।

हिजो राती १ तला भएको पक्की घरमा रहेको सुनचाँदी पसलमा घर पछाडि काठको ढोकाको कब्जा फुटाई लकर बाहिर राखिएको सुनचाँदी चोरी भएको सूचना पाएपछि यलाका प्रहरी कार्यालय चतरा र यलाका प्रहरी कार्यालय महेन्द्रनगरबाट प्रहरी टोली परिचालित भएको थियो । घटनाको अनुसन्धानका क्रममा चोरी गर्ने कार्यमा बराइली सम्लग्न भएको पाइएपछि पक्राउ गरिएको इलाका प्रहरी कार्यालय महेन्द्रनगरले जनाएको छ ।

अनुसन्धान गर्ने क्रममा शंकास्पद रहेका बराइलीको घरकोठा भित्र खानतलासी गर्दा दराज पछाडि कालो झोलामा लुकाई राखिएको चोरीको सुनका गरगहनाहरु ६ तोला ८३ लाल र चाँदीको गरगहनाहरु २९७ तोलाको अन्दाजी रु. १० लाख ४० हजार ५९० बराबरको गरगहना बरामद भएको हो । चोरी भएको सुचनाँदी बरामद भएसँ बराइलीलाई नियन्त्रणमा लिई इलाका प्रहरी कार्यालय महेन्द्रनगरबाट थप अनुसन्धान भइरहेको प्रदेश प्रहरी कार्यालय विराटनगरले जनाएको छ ।