ताप्लेजुङमा ट्याक्टर दुर्घटना हुँदा चार जनाको मृत्यु

ताप्लेजुङ । ताप्लेजुङको मैवाखोला गाउँपालिकामा गएराती ट्याक्टर दुर्घटना हुँदा चार जनाको मृत्यु भएको छ ।

मैवाखोला गाउँपालिका–४ साँघुस्थित याम्फेवा खोलानजिक चाप्लिङ खोल्सामा ट्याक्टर दुर्घटना हुँदा मैवाखोला गाउँपालिका–५ फाकुम्बा–कम्साङका ३१ बर्षीय पासाङ शेर्पा, २४ वर्षीय फुर्बा शेर्पा, मैवाखोला गाउँपालिका–४ साँघु ओदकका २२ वर्षीया शमिला शेर्पा र १७ वर्षीया लाकी शेर्पाको ज्यान गएको जिल्ला प्रहरी कार्यालय ताप्लेजुङले जनाएको छ ।

प्रहरीका अनुसार मैवाखोला गाउँपालिका ४ साँघुस्थित याम्फेवा खोलानजिक चाप्लिङ खोल्सामा मध्यराती साढे १२ बजे ट्याक्टर दुर्घटना भएको थियो । मैवाखोला गाउँपालिका–१ तेल्लाबुङबाट सोही पालिकाको वडा नं. ५ काम्साङतर्फ जाने क्रममा ट्याक्टर दुर्घटना भएको प्रहरीले जनाएको छ । मृत्यु हुनेमा दुई परिवारका दुई–दुई जना रहेका छन् ।