विद्यालयको सामग्री चोरी गरेको आरोपमा एक पक्राउ

सुनसरी । सुनसरीको इटहरी उपमहानगरपालिका–६ स्थित कविर माध्यमिक बिद्यालयबाट ल्यापटप र टेलिभिजन चोरी गरेको आरोपमा प्रहरीले एक जनालाई पक्राउ गरेको छ ।

सोमबार उक्त विद्यालयका ल्यापटप–२ थान र टेलिभिजन १ थान चोरी गरी तत्काल फरार भएका धरान उपमहानगरपालिका–१५ का २९ बर्षीय गौतम राईलाई प्रहरीले पक्राउ गरेको हो । चोरी गर्ने राईको सीसी क्यामेरमा चोरी गर्दै गर्दा कैद भएको फुटेजमा देखिएको हुलियाका आधारमा प्रहरीले पक्राउ गरेको हो ।

राईको हुलिया परिपत्र गरी खोजतलास गर्ने क्रममा हिजो दिउँसो १० बजे इलाका प्रहरी कार्यालय रानी विटारनगरबाट खटिएको प्रहरी गस्ती टोलीले नेपाल भारतको सिमा नजिक सडकमा समान सहित फेला पारी राईलाई पक्राउ गरेको हो । उनीमाथि थप अनुसन्धान भइरहेको प्रदेश प्रहरी कार्यालय विराटनगरले जनाएको छ ।