गाँजा बोकेको पिकअप सहित चालक पक्राउ

धनकुटा । धनकुटाको शहीदभूमि गाँउपालिका–४ हिले–छिन्ताङको कच्ची सडक खण्डबाट प्रतिबन्धित लागूऔषध गाँजा बोकेको पिकअप गाडी सहित चालकलाई प्रहरीले ‍पक्राउ गरेको छ ।

गत माघ २८ गते इलाका प्रहरी कार्यालय छिन्ताङबाट खटिएको प्रहरी गस्ती टोलीले छिन्ताङबाट हिलेतर्फ जाँदै गरेको को १ ज ३११८ नम्बरको पिकअप गाडीलाई चेकजाँचको क्रममा डाला भित्र ४ सय किलोग्राम (१५ बोरा) गाँजा बरामद गरेको थियो । उक्त गाडी प्रहरीले रोक्न खोज्दा नरोकी केही पर गाडी छाडी चालक फरार भएका थिए ।

गाडीबाट लागूऔषध गाँजा बरामद भएपश्चात फरार रहेका चालकको खोजतलास तथा अनुसन्धानका क्रममा फागुन ३ गते सुनसरीको इटहरी–२ मा लुकिछिपी बसेको अवस्थामा प्रहरीले फेला पारेको थियो । पक्राउ पर्ने चालक शहीदभूमी गाँउपालिका–४ का ३१ बर्षीय किरण राई रहेका छन् । पक्राउ परेका राईलाई धनकुटा जिल्ला अदालतबाट म्याद थप गरी घटनाका सम्बन्धमा थप अनुसन्धान भइरहेको जिल्ला प्रहरी कार्यालय धनकुटाले जनाएको छ ।