फिदिम । यस वर्षको बर्षायामको सुरुआतमै हेंवा खोलामा आएको बाढीले तटीय क्षेत्र तहसनहस भयो । बाढीले तटीय क्षेत्रका सबै संरचना, बालीनाली तथा पूर्वाधारमा क्षति पुर्याएपछि जनजीवन असामान्य बनेको छ ।
४ वटा मोटरेवल पुल बगाएको हेंवा खोलाले तटीय क्षेत्रमा रहेको हजारौं रोपनी खेतीयोग्य जमिनलाई खण्डहरमा परिणत गरेको छ । तर त्यो भन्दा मुख्य कुरा हेंवा खोलाले ठाउँ–ठाउँमा बहाव बदलेको छ । यसले तटीय क्षेत्रमा जोखिम बढाएको छ । हिलिहाङ गाउँपालिकाको हेंवा खोलाको तटीय क्षेत्रमा कृषि उत्पादन र पशुपालन गर्दै आउनुभएका भवानी योक्पाङ्देन तटीय क्षेत्र जोखिमपूर्ण बनेको वताउनुहुन्छ ।
“बाढी आउनुअघि ठूलो बगर थियो । फिजारिएको खोलामा बाढी आइहाल्दा पनि डराउनुपर्ने अवस्था थिएन”, योक्पाङ्देनले भन्नुभयो, “अहिले बाढीले सबै बगर पुरेको छ भने खोला गहिरिएर गएको छ ।” गहिरिएको खोलाले सानो बाढी आउँदा पनि बगर छिचोल्ने डर तटीय क्षेत्रका बासिन्दाको छ ।
विगतमा रहेकोभन्दा बाढी आएपछि खोलाले बहाव यत्रतत्र बदलेको छ । जसकारण पानीको मात्रा बढ्नासाथ बहाव बदलिएर वस्तीसम्म पस्ने खतरा कायमै रहेको योक्पाङ्देनको चिन्ता छ ।
“बर्खा सुरु मात्रै हुँदैछ । अझै पानी पर्ने समय ३/४ महिना बाँकी छ”, योक्पाङ्देनले भन्नुभयो, “समग्रमा खोलाले तटीय क्षेत्रमा चिन्ता थपेको छ ।” प्रायजसो साउन र भदौमा अधिक वर्षा हुने हुँदा बाढीको जोखिम उत्तिकै रहेको र अब बाढीले कता क्षति पुर्याउला भन्ने अनुमान गर्न नसकिने अवस्था आएको उहाँको भनाई छ ।
हेंवा खोला र तमोर नदीको दोभान माझीटारमा खोलाले शताब्दीऔंदेखि बसोबास गरिरहेको वस्तीमा कटान थालेको छ । फिदिम नगरपालिका–४ र हिलिहाङ गाउँपालिका–७ माझीटारमा कहिल्यै खेती नटुटेको खेतबारीलाई यसपालिको बाढीले ढुङ्गामुढाको खण्डहरमा परिणत गरिदिएको छ ।
दोभान नजिकै हेंवा खोलामा ढुङ्गा थुपारेको छ । नदीको कटान परिवर्तन हुनु र ढुङ्गा थुपारिनुले माझीटारको मुख्य वस्ती जोखिममा परेको स्थानीयवासी प्रकाश माझीको भनाई छ । “अहिलेसम्म हामीले यस्तो जोखिम देखेका/भोगेका थिएनौं”, माझीले भन्नुभयो, “यसपालि घर छोडेर भाग्नुपर्ला कि जस्तो बनायो ।”
बाढीका कारण हेंवा खोलाका कुलबहादुर लावतीको खेतीयोग्य जमिन बालुवा, ढुङ्गा र मुढाले भरिएको छ । जे रोप्यो त्यही फल्ने खेत बालुवाले पुरेपछि के आम्दानीले जिविका चलाउनेभन्ने चिन्ता परेको लावती वताउनुहुन्छ ।
वंगुर, हाँस र कुखुराको पालन तथा सागशब्जी उत्पादन गरी फिदिममा विक्री गर्दै आउनुभएका भवानी योक्पाङ्देनको लगानी बालुवामा परिणत भएपछि उस्तै चिन्तामा हुनुहुन्छ । माझीटारको धेरै धान उत्पादन हुने खेत बगाएको छ भने खानीपानी र सिंचाइका स–साना योजनालाई कामै नलाग्ने बनाइदिएको छ ।
हेंवा खोलाले शताब्दीऔंदेखि अन्नपात उत्पादन गरिँदै आएका खेतबारीमा क्षति पुर्याएको छ । खण्डहर र बगर बनेका खेतबारीमा तत्कालै उत्पादन हुने सम्भावना छैन् । जसले हिँउद र बर्खामा दुई खेती गरी जिविका चलाउँदै आएका कृषकलाई मारमा पारेको छ । त्यससँगै बाढीको जोखिमले भविश्यबारे पनि स्थानीयवासीलाई चिन्तित पारेको छ ।
आफूहरु जोखिममा परेपनि सरकारी निकायले वेवास्ता गरेको हिलिहाङ–७ की सुमिना लिम्बूको भनाई छ । “घर बगाएका, मृत्यु र बेपत्ता भएका परिवारबारे सरकारले चासो राखेको छ । तर घरबार भएर पनि बस्न नसक्ने स्थितिमा पुगेका हामीलाई कसैले एक शब्द सोध्नुभएको छैन्”, लिम्बूले हिलिहाङ गाउँपालिकाका निवर्तमान अध्यक्ष भुवानीप्रसाद लिङदेनसमक्ष गुनासो पोख्नुभयो, “आज बल्ल तपाईं हाम्रो पीडा हेर्न आइदिनु भयो । अरुलाई त फोन गरेर आइदिनुहोस् न भन्दा पनि मान्नुभएन ।”
तमोर कोरिडोर र मेची राजमार्गमा पेशा ब्यवसाय चलेका तथा खेतीयोग्य जमिनमा प्रशस्तै उत्पादन भइरहेका क्षेत्रलाई एकै बाढीले धराशायी बनाएपछि स्थानीयवासी अत्तालिएका छन् । स्थानीय सरकारहरुले केही ढाडस दिएर जोखिममुक्त गर्दै उत्पादन र ब्यवसायलाई पुरानै लयमा फर्काउनु आवश्यक रहेको जिल्ला समन्वय समिति पाँचथरका निवर्तमान प्रमुख विष्णुप्रसाद सापकोटाको भनाई छ ।
प्रतिक्रिया