सल्लेरीमा टिपर दुर्घटना हुँदा चालक र सहचालक घाइते

फिदिम । मेची राजमार्गअन्तर्गत पाँचथरको हिलिहाङ गाउँपालिका–७ सल्लेरीमा टिपर दुर्घटना हुँदा चालक र सहचालक घाइते भएका छन् । टिपर सडकमै पल्टिएपछि सडक पनि अवरुद्ध भएको छ ।

आज विहान १०ः३० बजे जोरपोखरीबाट हेंवा खोलातर्फ आउँदै गरेको प्र १–०२–००१ क ३८७४ नम्बरको टिपर अनियन्त्रित भई सडकमै पल्टिएको जिल्ला प्रहरी कार्यालय पाँचथरका सूचना अधिकारी मिलन थापाले जानकारी दिनुभयो । सो दुर्घटनामा टिपरका सहचालक संखुवासभाका २७ वर्षीय विक्रम बिक गम्भीर घाइते भएका छन् । उनको बाँया कोखामा चोट लागेको छ । उनलाई थप उपचारका लागि वीपी कोइराला स्वास्थ्य विज्ञान प्रतिष्ठान (घोपा क्याम्प) धरान पठाइएको छ ।

यस्तै टिफर चालक भोजपुरको षडानन्द नगरपालिका–१३ का २८ को रिन्छिन तामाङ सामान्य घाइते भएका छन् । उनको जिल्ला अस्पताल पाँचथरमा उपचार भइरहेको जिल्ला प्रहरी कार्यालय पाँचथरले जनाएको छ । प्रहरीले अवरुद्ध सडक सुचारु गर्ने प्रयास भइरहेको जनाएको छ ।