फिदिम । आउदो पुस ६ गतेबाट १५ गते सम्म सञ्चालन हुने ११ औं संस्करण फाल्गुनन्द गोल्डकपको आधिकारीक गीत (एन्थम) सार्वजनिक गरिएको छ ।
फिदिम स्पोटिङ क्लबको आयोजनामा हुन लागेको उक्त प्रतियोगिताको गीत शुक्रबार फिदिममा एक कार्यक्रमको आयोजना गरी सार्वजनिक गरिएको हो । फिदिम नगरपालिकाका मेयर मित्रप्रसाद काफ्लेले गीत सार्वजनिक गर्नुभएको क्लबका अध्यक्ष दीपेन्द्र थापा मगरले जानकारी दिनुभयो ।
डीपी खनालको शब्द रहेको गीतमा शंकर थापा स्माइलको संगीत रहेको छ । गीतमा प्रताप दास, किरण भुजेल, देबेन्द्र बराल, कमल श्रेष्ठ, अशोक मुकारुङ, ससिका राई, ममता गुरुङ, दीपा सुहाङ, मुना ठटाल, दिप्सन लिम्बू, खेम सुब्बा र नोगेन हाङसरुम्बाको स्वर रहेको छ ।
सेवा रेकर्डिङ स्टुडियोमा रेकर्ड गरिएको गीतको एरेन्ज देबेश राई र रेकर्डिङ तथा सम्पादन योगेन मुकारुङले गर्नुभएको हो ।
फिदिम स्थित फिदिम माध्यमिक विद्यालयको खेलमैदान भत्किएपछि ०७६ सालबाट यो प्रतियोगिता सञ्चालन हुन सकेको थिएन । यस पटक ‘ए’ डिभिजनका न्यूनतम चार वटा टिमसहित १० वटा फुटवल टिमलाई मैदानमा उतार्ने आयोजकले जनाएको छ ।
प्रतिक्रिया