फिदिम । फिदिम नगरपालिकाले परम्परागत खेती प्रणालीलाई सुधार गर्दै कृषिमा यान्त्रिकरण सुरु गरेको छ । उत्पादन वृद्धि र कृषि आधुनिकीकरणलाई लक्षित गर्दै यस आर्थिक वर्षमा हालसम्मकै ठूलो संख्यामा किसानलाई कृषि औजार र उपकरण अनुदानमा वितरण गर्ने तयारी थालेको हो ।
नगरपालिकाले चालु आर्थिक वर्षमा ३ करोड ६० लाख रुपैयाँ बराबरको कृषि उपकरण खरिद गरेको हो । ठेक्का प्रक्रियामार्फत १८१ थान मिनिटिलर, १६० च्याफकटर, १८५ राइस मिल, ११ थान मकै छोडाउने मेशिन, २ थान उखु मिल र ४० थान स्प्रेयर खरिद गरिएको छ ।
यस्तै, कृषि कार्यक्रम अन्तरगत ५४४ थान टनेल, ६५ वटा प्लाष्टिक पोखरी, ५३ काउम्याट, २० फ्रिज र १४० मिल्क क्यान लगायतका सामग्री पनि खरिद गरिएको छ ।
नगरप्रमुख मित्रप्रसाद काफ्लेका अनुसार उपकरण वडाको सिफारिसको आधारमा वितरण गरिनेछ । उहाँले भन्नुभयो, “कृषिमा प्रविधिको प्रयोगले उत्पादकत्वमा ठुलो फड्को मार्ने विश्वासका साथ औजार वितरण प्रक्रिया अगाडि बढाइएको हो।”
नगरपालिकाले केही सामग्री वडाको आन्तरिक बजेटबाट पनि खरिद गरेको छ । साथै, विद्युतिय खरीद प्रक्रिया अपनाइएकाले ५२ लाख ५ हजार ९२५ रुपैयाँ बचत गर्न सफल भएको छ ।
हाल नगरवासी किसानहरू नगरपालिकामा उपस्थित भई आवश्यक प्रक्रिया पूरा गर्दै कृषि औजारहरू दिदै छन्।
फिदिम नगरपालिकाका अनुसार यो वर्ष अनुदान वितरणमा हालसम्मकै ठूलो उपलब्धि हासिल गरेको कृषि विज्ञहरु बताउछन् ।
प्रतिक्रिया