ब्रम्ह योगाश्रम सिद्धस्थल जोरपोखरीमा सहश्र चण्डी अनुष्ठान सम्पन्न

पाँचथर । पाँचथरको जोरपोखरी स्थित ब्रम्ह योगाश्रम सिद्धस्थलमा सहश्र चण्डी अनुष्ठान महायज्ञ सम्पन्न भएको छ ।

हिलिहाङ गाउँपालिकाको वडा नं. ५ र ६ मा पर्ने यस स्थानमा विश्वशान्ति र मानव कल्याणको कामनाका साथ आयोजित उक्त महायज्ञ ८० दिनसम्म सञ्चालन भएको थियो । गत असार ७ गतेबाट सुरु भएको महायज्ञ विहीवार सम्पन्न भएको हो । विहीवार पूर्णाहुती गरी तिलक प्रसाद ग्रहण गरी महायज्ञ सम्पन्न भएको ब्रम्ह योगाश्रम सिद्धस्थलका अध्यक्ष नीतिराज रेग्मीले जानकारी दिनुभयो ।

हिन्दू दर्शनशास्त्रअनुसार सहश्र चण्डी नवरथ सहित अशुभ परेको समयमा तीन आवृत्ति, पाँच आवृत्तिदेखि क्षमताअनुसार १०० आवृत्तिसम्म वाचन गरी भगवतीको आरधना गर्ने गरिन्छ । ब्रम्ह योगाश्रम ठूलो र विशिष्ट स्थान भएकाले यहाँ ठूलो लक्ष्य राखेर विश्वशान्तिका लागि सहश्र आवृत्ति (१००० आवृत्ति) को सङ्कल्प राखी महायज्ञ आयोजना गरिएको रेग्मीले वताउनुभयो । चार वर्षअघि नै सहश्र आवृत्ति सम्पन्न लक्ष्य राखिएको भएपनि कोरोनाभाइरस सङ्क्रमणको महामारीका कारण अहिले मात्रै सम्भव भएको उहाँको भनाई छ । सहश्र आवृत्तिका लागि ब्राम्हणहरुले ८० दिनसम्म चण्डी वाचन गरेका थिए ।

विश्वशान्ति, मानव कल्याण तथा सद्वुद्धि प्राप्ति, द्वेष, राग, दुवाच्य र अनादर समाप्तिका लागि महायज्ञ आयोजना गरिएको रेग्मीले वताउनुभयो । पूर्णाहुतीको अवसर पारेर १०० जना ब्राम्हणलाई भोजन गराउने कार्य समेत सम्पन्न भएको छ भने गायत्री अनुष्ठान समेत सम्पन्न भएको उहाँले जानकारी दिनुभयो । पूर्णाहुती कार्यक्रममा राजनीतिक दलका नेताहरु, विभिन्न क्षेत्रका अगुवाहरु, जनप्रतिनिधिहरु लगायतले शुभकामना मन्तब्य ब्यक्त गरेका थिए । अनुष्ठानमा हिलिहाङ सहित विभिन्न क्षेत्रमा भक्तजनहरु सहभागी भएको ब्रम्ह योगाश्रम सिद्धस्थलका सदस्य राजेन्द्रप्रसाद काफ्लेले जानकारी दिनुभयो ।

जोरपोखरीको आसपासमा १९८३ सालमा स्वर्गद्वारी बाबा कपिलानन्द स्वामीले ध्यान, तपस्या र लक्ष्य हवन गरेको इतिहास छ । यसपश्चात समाजमा जोरपोखरी पवित्र तीर्थस्थल, पवित्रभूमिको चर्चामा आएको जानकारहरुको भनाई छ । यहाँ सिद्ध पुरुषहरु ब्रम्हभ्याषानन्द गिरी, जोगानन्द, खप्तड स्वामी, जुम्ली महाराज, एक यहीँकी माताले तपस्या गरेर अनुभव सिद्ध गरेका थिए । खप्तड स्वामीले बसोबास गरेको गुफा आगेजुङ गुम्बाको मुनी रहेको छ । आगेजुङ गुम्बा समेत जोरपोखरीभन्दा केही किलोमिटर माथि रहेको छ । जोरपोखरी अन्यत्रैबाट सरेर यहाँ आएको विश्वास गरिन्छ ।

ब्रम्ह योगाश्रममा विद्यार्थी पढाउने, होम गर्ने, लक्ष्य हवन गर्ने, गायत्री मन्त्र जप्ने, ध्यान योग हुने गरेको छ । पूर्वको संस्कृत अध्ययन एवं गुरुकुलको सम्पूर्ण संस्कार जोरपोखरीबाटै प्रादुर्भाव भएको वताइन्छ । २०५२ सालबाट यहाँ ब्रम्हयोगाश्रम सिद्धस्थल जोरपोखरी नामको धार्मिक संस्था स्थापना गरी आश्रम दर्ता गरी सञ्चालन भइरहेको छ । वि.सं. १९८३ तिर चन्द्रप्रसाद संग्रौला, ब्रम्हाभ्यास, यज्ञनिधि रेग्मी र हर्कबहादुर सुब्बाको सक्रियतामा शिवालय स्थापना भएको थियो । २०३० सालसम्म चलेर बन्द भएको उक्त शिवालय तथा गुरुकुल २०५२ सालमा पुनः सुरु गरिएको योगाश्रमका अध्यक्ष रेग्मीले वताउनुभयो । अहिले हिलिहाङ गाँउपालिकाको सहयोगमा गुरुकुल, मन्दिर तथा जोरपोखरी संरक्षणको कार्य भइरहेको छ ।

अहिले पर्यटकीय क्षेत्र बनाउन जोरपोखरीमा पानी भर्नुपर्ने, वैदिक धार्मिक साँस्कृतिक कार्यक्रमहरु सञ्चालन गर्नुपर्ने स्थानीयवासीको माग छ । समुद्री सतहबाट करिब १ हजार दुई सय मिटर उचाईमा रहेको जोरपोखरीबाट हिमश्रृङ्खलादेखि पूर्वका विभिन्न धार्मिक मठ मन्दिरहरु देख्न सकिन्छ । जोरपोखरीलाई तेजपुञ्जका नामले परिचित आगेजुङ गुम्बा, ऐतिहासिक हिलिहाङ दरबार र भोटेगढी, मनोरम स्थल कालापानी लगायतसँगै एकीकृत गर्दै पर्यटकीय केन्द्र बनाउनुपर्नेमा स्थानीयवासीको जोड छ ।