आगलागीमा एक घर जल्यो

फिदिम । पाँचथरको फिदिम नगरपालिका–२ साम्दिन घुम्तीस्थित दिलकुमारी राईको घर आज अपरान्ह आगलागी हुँदा राईको घर जलेर नष्ट भएको छ ।

आगलागीमा परी राईका श्रीमान जयप्रकाश राई घाइते हुनुभएको छ । घाइतेलाई थप उपचारका लागि झापा रेफर गरिएको छ । आगलागीमा परी किराना पसल तथा होटल रहेको राईको घर जलेर नष्ट भएको छ । आगलागीमा सो घरमा रहेका धनमाल, लत्ताकपडा तथा पसलका सामग्री समेत जलेका छन् ।

फिदिम नगरपालिकाका बारुणयन्त्रको मद्दतमा तीन वटै सुरक्षा निकायका सुरक्षाकर्मी तथा स्थानीयवासीले नियन्त्रणमा लिएका थिए । आगलागीको कारण र भएको क्षतिको विवरण प्राप्त हुन बाँकी छ ।