हेवाखोलामा अचेत अवस्थामा फेला परेकी युवतीको मृत्यु

पाँचथर । पाँचथरको फिदिम नगरपालिका वडा नं. ४ र हिलिहाङ गाउँपालिका वडा नं. ७ सिमाना स्थित हेवाखोलामा एक युवती अचेत अवस्थामा फेला परेकी छिन्।

अन्दाजी २४/२५ वर्ष जस्तो देखिने पहाडी मूलकी जस्तो देखिने युवतीलाई खोलाले बगाएर ल्याएको अचेत अवस्थामा देखेपछि स्थानीयवासी र प्रहरीको टोलीले तत्काल उद्धार गरेका थिए।

घटनास्थलबाट तत्कालै जिल्ला अस्पताल पाँचथरमा ल्याएर उपचारको लागि भर्ना गराइएको थियो। बिहान १०ः३० बजे फेला परेकी ती युवतीलाई जिल्ला अस्पतालमा ११ः१० बजे पुर्‍याइएको थियो। चिकित्सकले जाँच गर्दा बिहान ११ः१५ बजे मृत घोषणा गरेको प्रहरीले जनाएको छ ।

प्रहरीका अनुसार, मृतक युवती फालेलुङ गाउँपालिका–७ पापुन्दिन बस्ने रत्नकुमार आङ्बोकी छोरी मनिषा आङ्बो भएको मृतकका काका जसनन्द लिम्बुले सनाखत गरेको जिल्ला प्रह्री कार्यालय पाँचथरले जनाएको छ ।

युवतीको शव पोष्टमार्टमका लागि जिल्ला अस्पतालको शवगृहमा राखिएको छ भने मृत्युको कारणबारे थप अनुसन्धान भइरहेको जिल्ला प्रहरी कार्यालय पाँचथरले जनाएको छ ।