यासोक । कुम्मायक गाउँपालिका–५, पिपलबोटेस्थित महेन्द्रोदय माध्यमिक विद्यालयको खेलमैदानमा सञ्चालित साविक वडास्तरीय पुरुष नकआउट फुटबल प्रतियोगिताको उपाधि ४ नम्बर वडाले उचालेको छ । कुम्मायक गाउँपालिका वडा नं. ५ कार्यालयले सञ्चालन गरेको प्रतियोगिताको फाइनल खेलमा साविक ८ नम्बर वडालाई ५–० को फराकिलो जित निकाल्दै वडा नं. ४ ले उपाधि हात पारेको हो ।
कुम्मायक गाउँपालिका–५ अन्तर्गतका साविक ९ वडामध्ये साविक वडा नं. २ बाहेक ८ वटा वडाको सहभागिता रहेको प्रतियोगितामा प्रतिस्पर्धात्मक खेलहरू भएका थिए । फाइनल प्रवेशका लागि भएको पहिलो सेमिफाइनलमा साविक वडा नं. ८ ले साविक वडा नं. ९ लाई पेनाल्टी सुटआउटमा पराजित गर्दै फाइनलमा स्थान बनाएको थियो। त्यस्तै, दोस्रो सेमिफाइनलमा साविक वडा नं. ४ ले साविक वडा नं. ५ लाई २–० गोल अन्तरले हराउँदै फाइनल यात्रा तय गरेको थियो।
प्रतियोगिताको विजेता साविक वडा नं. ४ ले नगद रु. २५ हजारसहित ट्रफी, मेडल र प्रमाणपत्र प्राप्त गरेको छ भने उपविजेता साविक वडा नं. ८ ले नगद रु. १५ हजारसहित ट्रफी, मेडल र प्रमाणपत्र प्राप्त गरेको छ।
त्यस्तै, प्रतियोगितामा विभिन्न विधाका उत्कृष्ट खेलाडी तथा टोलीलाई समेत नगद पुरस्कार र मेडल प्रदान गरिएको छ। फेयर प्ले अवार्ड साविक वडा नं. ७ ले प्राप्त गरेको छ। उत्कृष्ट गोलकिपर सचिन लावती, उत्कृष्ट डिफेन्डर देवेन्द्र मगर, उत्कृष्ट मिडफिल्डर नइन्द्र चेम्जोङ, उदीयमान खेलाडी डिल्लीराम थापा र प्रतियोगिताकै सर्वोत्कृष्ट खेलाडी (प्लेयर अफ द टुर्नामेन्ट) सौगात चेम्जोङ घोषित भएका छन्। त्यसैगरी, सर्वाधिक गोलकर्ताको उपाधि सुहाङ चेम्जोङ र सुजन चेम्जोङले संयुक्त रूपमा प्राप्त गरेका छन्।
प्रतियोगिताको समापन कार्यक्रम कुम्मायक गाउँपालिका–५ का वडा अध्यक्ष निर्मलराज घिमिरेको अध्यक्षतामा सम्पन्न भएको थियो। कार्यक्रममा गाउँपालिका उपाध्यक्ष महेन्द्रबहादुर खड्का प्रमुख अतिथिका रूपमा उपस्थित रहनुभएको थियो । स्थानीय स्तरमा खेलकुदको विकास, खेलाडीको प्रतिभा पहिचान तथा आपसी सद्भाव र खेलकुद संस्कृतिको प्रवद्र्धन गर्ने उद्देश्यले प्रतियोगिता आयोजना गरिएको आयोजक वडा कार्यालयले जनाएको छ।
प्रतिक्रिया