पाँचथर । पाँचथरको फाल्गुनन्द गाउँपालिका–६ र ७ स्थित वासाँगुमा लाग्ने ऐतिहासिक द्वितीया मेलामा यसपटक दर्शकको उल्लेख्य सहभागिता देखिएका छन । मेलाको अवसरमा आयोजित सांगीतिक कार्यक्रममा चर्चित गायक दिपक लिम्बूको प्रस्तुतिसँगै वासाँगु क्षेत्र संगीतमय बनेको हो ।
नेपाली तारा सिजन १ का बिजेता समेत रहेका गायक लिम्बूका गीतमा रमाउँदै दर्शकहरू छमछमी झुमेका थिए । उहाँको प्रस्तुतिले मेलामा सहभागी दर्शकलाई मनोरञ्जन प्रदान गरेको थियो । रातको समयमा आयोजित कार्यक्रममा बालबालिका, युवायुवतीदेखि वृद्धवृद्धासम्मको उल्लेख्य उपस्थिति देखिएको थियो । गायत लिम्बूले “मैले त्यहि भएर मन पाराएको, ढल्क्यो, ढल्क्यो, मेरो कल्पनामा आज एउटी परी, नाँइ नभन्नु ल, कहाँ होला स्वर्ग लगायत दर्जनबढि गीत गाउँनुभएको थियो ।
त्रिवेणी युवा क्लव नेपालले आयोजना गरेको वृहत सास्कृत कार्यक्रममा अमृता सम्बाहाम्फे, सुजन आङ्देम्बे लगायत राष्ट्रिय र स्थानीय कलाकारहरुले गायन तथा नृत्य प्रर्दशन गर्दै मनोरञ्जन दिएका थिए । मेलामा सांगीतिक कार्यक्रमसँगै स्थानीय संस्कृति, परम्परा र सामाजिक सद्भावको झल्को समेत देखाइएको थियो ।
वर्षेनी वासाँगुको द्वितीया मेला तथा भलिवल प्रतियोगितामा स्थानीय धार्मिक, सांस्कृतिक तथा सामाजिक पहिचानसँग जोडिएको पर्वका रूपमा मनाइने गरिएको छ । यस्ता मेलाले स्थानीय कला, संस्कृति र पर्यटन प्रवद्र्धनमा समेत योगदान पुर्याउँदै आएको आयोजकले जनाएको छ ।
प्रतिक्रिया