आहालमा डुबेर बालकको मृत्यु

फिदिम । घर निर्माणका लागि पानी जम्मा गर्न बनाइएको आहालमा डुबेर हिँजो पाँचथरमा एक बालकको मृत्यु भएको छ ।

जिल्लाको फिदिम नगरपालिका–६ सिवा घर भई फिदिम नगरपालिका–१ वुद्धमार्गमा बस्दै आएका विशाल मगरका तीन वर्षीय छोरा आरुषको हिँजो दिउँसो फिदिम–२ पल्लोटारमा पोखरीमा डुबेर मृत्यु भएको हो । सुरेन्द्र जबेगूले निर्माण गरिरहेको घरमा काम गर्न गएकी विशालकी श्रीमती छेम्बी राईसँगै बालक पल्लोटार पुगेका थिए ।

खेल्ने क्रममा पोखरीमा डुबेर अचेत बनेको अवस्थामा बालकलाई जबेगूले फेला पारेपछि उपचारका लागि जिल्ला अस्पताल ल्याइएकामा अपराह्न ४ः२२ मा चिकित्सकले मृत घोषित गरेको जिल्ला प्रहरी कार्यालय पाँचथरले जनाएको छ । घरबारे थप अनुसन्धानका लागि प्रहरी निरीक्षकको नेतृत्वमा प्रहरी टोली परिचालन गरिएको जिल्ला प्रहरी कार्यालय पाँचथरका प्रमुख प्रहरी नायव उपरीक्षक हरि खतिवडाले जानकारी दिनुभयो ।