डीएफसी मोरङ किराँत गोल्डकपको फाइनलमा प्रवेश

फिदिम । पाँचथरको फिदिममा जारी प्रथम किराँत गोल्डकप फुटवल प्रतियोगिताअन्तर्गत बुधबार सम्पन्न पहिलो सेमिफाइनलमा आयोजकलाई पराजीत गर्दै डाँगीहाट फुटवल क्लब मोरङ फाइनलमा प्रवेश गरेको छ ।

फिदिमको फिदिम माध्यमिक विद्यालयको खेलमैदानमा सम्पन्न खेलमा आयोजक पाँचथर फुटवल क्लबलाई ट्राइब्रेकरमा ४–१ गोलअन्तरले पराजीत गर्दै मोरङ उपाधिनजिक पुगेको हो । निर्धारित समयमा दुवै फुटवल टोलीबाट गोल हुन नसकेपछि खेलको निर्णय ट्राइब्रेकरबाट लिइएको थियो । ट्राइब्रेकरमा मोरङका चार खेलाडीले गोल गर्दा आयोजकका एक खेलाडीले मात्रै गोल गर्न सके ।

मोरङका लागि उमेश कार्की, उमेश राई, सञ्जय धिमाल र अभिषेक लिम्बूले गोल गरे । तर आयोजक पाँचथर क्लबका रोशन आङदेम्बेको प्रहार गोल पोष्टबाट बाहिरिएको थियो भने प्रकाश धमलाको प्रहार मोरङका गोलरक्षक प्रमिजय गच्छदारले रोक्न सफल भएका थिए । आयोजक टिमका अनुकेश शर्माको प्रहार भने गोलमा परिणत भएको थियो ।

आजको खेलको उत्कृष्ट खेलाडी (म्यान अफ दी म्याच) डीएफसी मोरङका गोलरक्षक प्रमिजय गच्छदार घोषित हुँदै रु. ५ हजार रकम र मेडल प्राप्त गरे । भोलि हुने दोश्रो सेमिफाइनलमा विर्तामोड युनाइटेड क्लब झापा र कर्णसिंह सोनाम स्मृति क्लब ताप्लेजुङवीच प्रतिस्पर्धा हुने आयोजक पाँचथर फुटवल क्लबका अध्यक्ष अनुराग मगरले जानकारी दिनुभयो ।

प्रतियोगिताको फाइनल खेल मङ्सिर २३ गते हुनेछ । प्रतियोगिताको विजेताले रु. चार लाख चार हजार ४४४ र उपविजेताले रु. दुई लाख दुई हजार २२२ सहित ट्रफी हात पार्नेछन् ।