लामो दूरीपछि लिङ्देन र थापा एउटै मञ्चमा, राजसंस्थाका पक्षधरहरू एकजुट

काठमाडौँ — करिब तीन वर्षको दूरीपछि राप्रपाका अध्यक्ष राजेन्द्र लिङ्देन र राप्रपा नेपालका अध्यक्ष कमल थापा एउटै मञ्चमा देखिनुभएको छ ।

सोमबार शान्तिबाटिकामा राप्रपा नेपालले आयोजना गरेको कार्यक्रममा उहाँहरूबीच सार्वजनिक सहकार्य देखिएको हो।

२०७८ साल मंसिरमा सम्पन्न राप्रपाको महाधिवेशनमा अध्यक्ष पदका लागि लिङ्देन र थापा प्रतिस्पर्धी बन्नुभएको थियो।

लिङ्देनले १,८४४ मत ल्याएर थापालाई २२७ मतको अन्तरले पराजित गरेका थिए।

त्यसपछि थापाले पार्टी विभाजन गर्दै राप्रपा नेपाल पुनःस्थापना गरेका थिए।

महाधिवेशनपछि थापाले पूर्वराजा ज्ञानेन्द्र शाहले चुनावमा आफूलाई हराउन भूमिका खेलेको आरोप लगाउँदै ज्ञानेन्द्रसँग पनि दूरी बढाएका थिए।

त्यसयता लिङ्देन र थापा आ–आफ्नै अभियानमा लागे पनि एउटै एजेन्डा बोकेका यी नेताहरू सँगै देखिनुभएको थियो ।

उहाँहरूबीचको विभाजनको मुख्य कारण आपसी अस्वीकार र विश्वासको संकट थियो।

तर पछिल्ला दिनहरूमा पूर्वराजा ज्ञानेन्द्रले नै दुवै नेतालाई एउटै मञ्चमा ल्याउन पहल गरेको बताइएको छ। निर्मला निवासमा केही दिनअघि भएको भेटमा ज्ञानेन्द्रले राजसंस्था पुनःस्थापनाको अभियानमा लागेकाहरूलाई एकजुट हुन आग्रह गर्नुभयो ।

कार्यक्रममा राप्रपा अध्यक्ष लिङ्देनले राजसंस्थाको पुनःस्थापना र हिन्दू राष्ट्रको पक्षमा हुने सबै शान्तिपूर्ण कार्यक्रममा ऐक्यवद्धता रहने बताउनुभयो ।

भ्रष्टाचार र कुशासनले देश आक्रान्त भएको उल्लेख गर्दै लिङ्देनले सबै राष्ट्रवादी शक्ति एकठाउँमा आउनुपर्ने आवश्यकता औंल्याउनुभयो।

लिङ्देनले प्रजातन्त्रको नाममा देशमा लुटतन्त्र र निरंकुशता हावी भएको भन्दै त्यसको अन्त्यका लागि उनीहरूबाहेक अरू विकल्प नरहेको दाबी गर्नुभयो । उहाँले चैत १५ को घटनामा पक्राउ परेका व्यक्तिहरूको रिहाइ र घटनाको छानबिनका लागि न्यायिक आयोग गठन गर्न दबाव सिर्जना गर्नुपर्ने धारणा पनि राख्नुभयो ।

सोही अवसरमा राप्रपा नेपालका अध्यक्ष कमल थापाले समान विचार भएका सबै शक्ति एकताबद्ध भई हिन्दू राष्ट्र र राजसंस्थाको पुनःस्थापना सम्भव हुने बताउनुभयो । उहाँले केही हप्ताभित्रै संयुक्त आन्दोलनको घोषणा गर्न सकिने संकेत दिनुभयो।

संयुक्त जनआन्दोलन समितिका संयोजक नवराज सुवेदीले राष्ट्रवादी शक्ति आवश्यक पर्दा एकजुट हुने उदाहरण यही कार्यक्रम भएको बताउनुभयो । उहाँले राजसंस्था, हिन्दू राष्ट्र र बहुदलीय प्रजातन्त्रका लागि मिलेर अघि बढ्नुपर्नेमा जोड दिनुभयो ।

राजावादी नेता केशरबहादुर विष्टले भने राष्ट्रवादीहरूको प्रदर्शनलाई हिंसात्मक बनाउने प्रयास राज्यबाटै भएको आरोप लगाउनुभयो ।