जसपाले मन्त्री परिवर्तन गर्दै, आजै सपथको तयारी

काठमाडौं । जनता समाजवादी पार्टी (जसपा)ले आफ्ना मन्त्रीहरु परिवर्तन गर्ने भएको छ । पार्टी अध्यक्ष उपेन्द्र यादवले नयाँ मन्त्रीहरुको नाम आइतबार प्रधानमन्त्री शेरबहादुर देउवालाई सिफारीस गर्नुभएको छ ।

नयाँ बन्ने मन्त्रीहरूमा इस्तियाक राई, प्रदीप यादव र मृगेन्द्रकुमार सिंह रहेका छन् । सामान्य प्रशासन मन्त्रालयमा राजेन्द्र श्रेष्ठ भने परिवर्तन नहुने हुनुभएको छ ।

जसपाका तर्फबाट भौतिक पूर्वाधार तथा यातायात मन्त्री रेनु यादव, कृषि तथा पशुपंक्षी विकास मन्त्री महिन्द्रराय यादव र वन तथा वातावरण मन्त्री रामसहाय प्रसाद यादवको स्थानमा नयाँ मन्त्रीहरु जानेछन् । भौतिक पूर्वाधार मन्त्रालयमा राई, कृषि तथा पशुपक्षी मन्त्रालयमा सिंह र वन मन्त्रालयमा यादव जाने बताइएको छ ।

सरकारमा जसपाका चार जना मन्त्रीहरु छन् । नयाँ मन्त्रीहरुको सपथ आज नै हुने प्रधानमन्त्रीका प्रेस सल्लाहकार गोविन्द परियारले जानकारी दिनुभयो ।