बावुलाई मुस्लीले प्रहार गरी फरार टंकबहादुर पक्राउ

फिदिम । आफ्नै बावुमाथि धान कुट्ने मुस्लीले प्रहार गरी हत्या गरेको आरोपमा तेह्रथुमबाट एक युवक पक्राउ परेका छन् ।

जिल्लाको छथर गाउँपालिका वडा नं. ५ ठकुरीटोलका २४ वर्षीय टंकबहादुर भण्डारीलाई प्रहरीले गएराती पक्राउ गरेको हो । प्रहरीका अनुसार घरायशी विवाद हुँदा टंकबहादुरले हिँजो विहान सवा ६ बजे आफ्नै ५३ वर्षीय बावु भक्तबहादुर भण्डारीलाई धान कुट्ने मुस्लीले टाउकोमा प्रहार गरेका थिए ।

बावु घाइते भएपछि उनी फरार थिए । खोजी क्रममा उनलाई गएराती म्याङलुङ नगरपालिकाको पिङ्गुवा खोलाको पुलबाट पक्राउ गरिएको जिल्ला प्रहरी कार्यालय तेह्रथुमले जनाएको छ ।

छोरा टंकबहादुरले मुस्लीले टाउकोमा प्रहार गर्दा गम्भीर घाइते भएका भक्तबहादुरको उपचारका क्रममा हिजो विहान सवा ७ बजे छथर अस्पतालमा मृत्यु भएको थियो ।

जिल्ला प्रहरी कार्यालय तेह्रथुम र इलाका प्रहरी कार्यालय वसन्तपुरबाट खटिएका प्रहरी टोलीले टंकबहादुरलाई गएराती पक्राउ गरी आज जिल्ला अदालतबाट थप म्याद लिई अनुसन्धान थालिएको जिल्ला प्रहरी कार्यालय तेह्रथुमले जनाएको छ । टंकबहादुरले घरायशी विवादमा बावु भक्तबहादुरमाथि आक्रमण गरेको खुल्न आएको प्रहरीको भनाई छ ।