पौडी खेल्ने क्रममा डुबेर दुई बालबालिकाको मृत्यु

झापा । झापामा पौडी खेल्ने क्रममा डुबेर दुई बालबालिकाको मृत्यु भएको छ ।

शिवसताक्षी नगरपालिका–९ आइतबारे बस्ने सुस्मा सुन्दासकी छोरी एन्जिला सुन्दास र सोही ठाउँका ध्रुव राईका छोरा सिकुम राईको पानीमा डुबेर मृत्यु भएको हो । मृतक बालिकाको उमेर अनुमानित ११ वर्ष र बालकको उमेर अनुमानित १२ वर्ष भएको प्रहरीले जनाएको छ ।

पौडी खेल्न जाने भनी घरबाट हिँडेका उनीहरू अबेरसम्म घर नफर्किएपछि खोजतलास गर्दा कन्काई सिँचाई नहरको डिलमा उनीहरूले लगाएको कपडा र चप्पल फेला परेको थियो ।

त्यसपछि प्रहरीलाई खबर गरिएको थियो । इलाका प्रहरी कार्यालय झिलझिलेबाट खटिएको टोलीले स्थानीयसमेतको सहयोगमा खोजतलास गरेको थियो ।

उनीहरूको शव कपडा राखेको स्थानदेखि ४ किलोमिटर पश्चिम शिवसताक्षी नगरपालिका–७ स्थित सताक्षी खोलामा डुबेको अवस्थामा फेला पारेको र यस सम्बन्धमा थप अनुसन्धान भइरहेको प्रहरीले जनाएको छ ।