लक्की शेर्पा र धर्मदत्त देवकोटा एमाले प्रवेश, माओबादीले कम्युनिष्ट आन्दोलनलाई घात गरेको निष्कर्ष

काठमाडौं । स्थानीय तहको निर्वाचको मिति नजिकिदै जाँदा पुष्पकमल दाहाल प्रचण्ड नेतृत्वको नेकपा माओवादी केन्द्र छाडदै एमाले प्रवेशको लहर चलेको छ । प्रचण्ड नेतृत्वको माओवादीबाट नेपालको कम्युनिष्ट आन्दोलनमाथि घात भएको निश्कर्षसहित आज मात्रै चर्चित नेताहरु सो पार्टी परित्याग गरी नेकपा एमाले प्रवेश गरेका छन ।

नेकपाको स्थापना दिवसकै अवसर पारेर आज माओवादी केन्द्रीय सदस्य तथा सहकारी बिभाग प्रमुख धर्मदत्त देवकोटा, अष्ट्रेलियाका लागि पूर्वनेपाली राजदूत तथा संबिधानसभा सदस्य लक्की शेर्पा सिंगो टीमसहित एमाले प्रवेश गर्नुभएको छ । उहाँहरु दुवै जना माओवादी केन्द्रका पूर्वपोलिटब्यूरो सदस्य हुनुहुन्छ ।

यस्तै लेखनाथ नगरपालिकाका पूर्वमेयर सालिकराम पौडेलसहित सागर ढकाल, डा. ल्हाक्पा शेर्पा, कोषबहादुर जिसीलगायतका चर्चित नेताहरु पनि एमाले प्रवेश गर्नुभएको छ । उहाँहरुलाई एमाले केन्द्रीय कार्यालय च्यासलमा आज आयोजित बिशेष कार्यक्रममा एमाले अध्यक्ष केपी शर्मा ओलीसहित एमालेका शीर्ष नेताहरुले पार्टीमा स्वागत गर्नुभएको छ ।

माओवादीले राष्ट्रको हितबिपरितको काम गरिरहेको र कांग्रेसको पुच्छर बनेर कम्युनिष्ट आन्दोलन सकाउने अभियान चलाएकोले सो पार्टी त्यागेर एमाले रोजेको उहाँहरुको भनाई छ । जनताटाइम्सबाट साभार