ब्राउन सुगर सहित २ जना भारतीय पक्राउ

विर्तामोड । प्रहरीले झापाको बिर्तामोडबाट प्रतिबन्धित लागूऔषध ब्राउन सुगर सहित २ जनालाई पक्राउ गरेको छ ।

हिजो बेलुका इलाका प्रहरी कार्यालय अनारमानीबाट खटिएको प्रहरी टोलीले बिशेष सूचनाका आधारमा नगरपालिका–५ मा WB74B A6779 नम्वरको मोटरसाइकललाई रोकेर चेकजाँच गरेको थियो । सो क्रममा प्रहरीले मोटरसाइकलमा सवार ब्यक्तिहरुको साथबाट ८ ग्राम ५०० मिलि ग्राम ब्राउन सुगर बरामद गरेको हो ।

ब्राउन सुगर फेला परेपछि मोटरसाइकल चालक भारत किसनगंज गलगलियाका २५ बर्षीय दिलसाद रहमान र पछाडि सवार रहेका २० बर्षीय सन्वाज खानलाई प्रहरीले नियन्त्रणमा लिएको छ । प्रतिबन्धित लागूऔषध सहित पक्राउ परेका उनीहरुमाथि इलाका प्रहरी कार्यालय अनारमनीबाट थप अनुसन्धान र कानूनी कारबाहीको प्रकृया अघि बढेको प्रदेश प्रहरी कार्यालय विराटनगरले जनाएको छ ।