पाँचथर । प्रदेश नं. १ का प्रहरी प्रमुख प्रहरी नायव महानिरीक्षक (डिआइजी) श्यामलाल ज्ञवालीले आज जिल्ला प्रहरी कार्यालय पाँचथरको निरीक्षण भ्रमण गर्नुभएको छ ।
भ्रमणका क्रममा डिआइजी ज्ञवालीले जिप्रका पाँचथरका सबै शाखाहरुको निरीक्षण गरी शाखाहरुमा कार्यरत प्रहरी कर्मचारीहरुलाई आवश्यक निर्देशन दिनु भएको छ । निर्देशनका क्रममा डिआइजी ज्ञवालीले धार्मिक पर्यटकीय क्षेत्रहरु रहेको पहाडी जिल्ला पाँचथरमा शान्ति सुरक्षा कायम राख्न निरन्तर लामो तथा छोटो गस्तीहरु खटाउन निर्देशन दिनुभएको प्रदेश प्रहरी कार्यालय विराटनगरले जनाएको छ ।
अपराधिक गतिविधि, चोरी तस्करीका घटना लगायत घटनाहरुलाई नियन्त्रण गरी नागरिकहरुलाई शान्ति र सुरक्षाको प्रत्याभूति दिलाउने कार्यमा निरन्तर लाग्न उहाँले निर्देशन दिनुभयो । यस्तै पाँचथरमा लामो समयदेखि प्रहरीले सञ्चालन गर्दै आएको जनचेतनामूलक कार्यक्रमको डिआइजी ज्ञवालीले प्रसंशा गर्दै सो कार्यलाई निरन्तरता दिन निर्देशन दिनुभएको छ ।
सचेतनामूलक कार्यमा आमनागरिकलाई समेट्न तथा सेवाग्राहीलाई समान ब्यवहार गर्न समेत उहाँले निर्देशन दिनुभएको प्रदेश प्रहरी कार्यालय विराटनगरले जनाएको छ । यस क्रममा जिल्ला प्रहरी कार्यालय पाँचथरका प्रमुख प्रहरी नायव उपरीक्षक हरी खतिवडाले पाँचथर जिल्लाको वस्तुस्थितिबारे जानकारी गराउनु भएको थियो ।
प्रतिक्रिया