श्रीमानको कुटपीटबाट श्रीमतीको मृत्यु

दैलेख । दैलेखमा श्रीमानको कुटपीटबाट श्रीमतीको मृत्यु भएको छ ।

गुराँस गाउँपालिका–८ गर्चाका २८ वर्षीय कृष्णबहादुर खड्काले कुटपीट गर्दा उनकी श्रीमती २७ वर्षीया श्रीमती पार्वती बीसीको मृत्यु भएको हो । श्रीमान् श्रीमतीबीच पारिवारिक विवाद भएपछि सोमबार राति साढे १० बजे कृष्णबहादुरले ढोकामा लगाउने गरालोले हानेर श्रीमतीको हत्या गरेको जिल्ला प्रहरी कार्यालय दैलेखले जनाएको छ ।

प्रहरीका अनुसार सो श्रीमानश्रीमती मात्रै बस्दै आएका थिए । विवाद भएपछि श्रीमानले काठको गरालोले हान्दा श्रीमतीको घटना स्थलमै मृत्यु भएको प्रहरीको भनाई छ । स्थानीयवासीका अनुसार विगत केही दिनदेखि श्रीमान् र श्रीमति बीचमा विवाद हुँदै आएको थियो । सोही विवाद बढ्दै गएपछि कृष्णबहादुरले श्रीमती पार्वतीलाई कुटपिट गरेका थिए ।

गत मंसिरमा मात्रै उनीहरुको परिवारले विवाह गराई दिएका थिए । प्रहरीका अनुसार दुवैजना शारीरिका रुपमा अशक्त थिए । श्रीमान् कान सुन्न नसक्ने र श्रीमती पनि शारीरिक रुपमा अशक्त रहेको पाइएको प्रहरीले जनाएको छ ।

कृष्णबहादुर सुन्न नसक्ने भएकाले अनुसन्धानमा समस्या भएको प्रहरीले जनाएको छ । शवलाई दैलेख जिल्ला अस्पतालमा पोष्टमार्टमका लागि पठाइएको र केटीको परिवारले जाहेरी दिने तयारी भएको प्रहरीले जनाएको छ ।