मोटरसाइकल चोरीमा संलग्न २ जना पक्राउ

इटहरी । सुनसरीको इटहरी उपमहानगरपालिका–२ मा पार्किङ गरी राखेका मोटरसाइकल चोरी गर्ने २ जनालाई प्रहरीले पक्राउ गरेको छ ।

पक्राउ पर्नेमा इटहरी–२ का दुर्गेस चौधरी र धनकुटा नगरपालिका–१ का सौगात थापा रहेका छन । उनीहरुले गत माघ २५ गते इटहरी–२ का बिक्रम खडकाको प्रदेश १–०२–०४० प ३३१८ नम्वरको सुपर स्पेल्डर मोटरसाइकल पार्किङ गरी राखेको स्थानबाट चोरी गरेका थिए ।

खोज तलासमा खटिएको प्रहरी टोलीले दुबै जनालाई बिराटनगर–११ बाट पक्राउ गरेको हो । पक्राउ परेका उनीहरुमाथि सुनसरी जिल्ला अदालतबाट म्याद थप गरी थप अनुसन्धान भइरहेको प्रदेश प्रहरी कार्यालय विराटनगरले जनाएको छ ।