फिदिम । पाँचथरमा छिमेकीले अचानक भरुवा बन्दुकले हान्दा गर्दा एक जना घाइते भएका छन् ।
फिदिम नगरपालिका–११ फलाँटेका भीम भनिने भोगेन्द्र घिमिरेले आज अपरान्ह ४ः३० बजेको समयमा बाटोमा हिँड्दै गरेका आफ्ना छिमेकी ५३ वर्षीय भेघराज आङ्बोलाई भरुवा बन्दुकले हानेका थिए ।
बन्दुकको छर्रा पेटमा लागेर गम्भीर घाइते भएका आङ्बोलाई उपचारका लागि साँझ ५ः३० बजे फिदिम ल्याइएको थियो । जिल्ला अस्पताल फिदिममा प्रारम्भिक उपचारपछि चिकित्सकले आङ्बोलाई थप उपचारका लागि सुविधासम्पन्न अस्पतालतर्फ रेफर गरेको जिल्ला प्रहरी कार्यालय पाँचथरका प्रहरी निरीक्षक सुमित कुशवाहाले जानकारी दिनुभयो ।
फेमे खोलामा रहेको जलविद्युत आयोजनामा काम गर्ने आङ्बो ड्यूटीका लागि खोलातर्फ जाँदै गर्दा घिमिरेले भरुवा बन्दुकले प्रहार गरेको प्रहरीले जनाएको छ ।
घटनापछि खटिएको प्रहरी टोलीले घिमिरेलाई साँझ ६ः१५ बजे फिदिम नगरपालिका–१ साभ्राङबाट एक थान भरुवा बन्दुकसहित पक्राउ गरेको प्रहरी निरीक्षक कुशवाहाले जानकारी दिनुभयो । घटनावारे थप अनुसन्धान भइरहेको प्रहरीले जनाएको छ ।
प्रतिक्रिया