रचनाले बनाइन् पक्की घर, फेसबुकबाट साटिन खुशी

काठमाडौं । गायन रियालिटी सोमार्फत सांगीतिक क्षेत्रमा उदाएकी झापाकी गायीका रचना रिमालले सांगीतिक क्षेत्रबाटै आम्दानी गरी पक्की घर निर्माण गरेकी छन् ।

रचनाले झापाको चन्द्रगढीमा रहेको पुरानो घर भएको ठाउँमा नयाँ पक्की चार कोठे घर निर्माण गरेकी हुन् । आमा बुवालाई एउटा घर बनाएर राख्ने सपना भएपनि सांगीतिक क्षेत्रबाटै सो सपना पूरा गर्ने आफूले कल्पना समेत नगरेको रचनाले सामाजिक सञ्जाल फेसबुकमार्फत बताएकी छन् ।

तर सांगीतिक क्षेत्रमा आफूलाई माया गर्ने दर्शक, स्रोता र दर्शकको मायाले एउटा सपना पूरा भएको वताउँदै रचनाले आफूलाई माया, साथ, हौसला र आशीर्वाद दिने सबैलाई धन्यवाद दिएकी छन् । उनले भविश्यमा समेत सांगीतिक क्षेत्रमै रहि सत्कर्म गर्ने वताएकी छन् ।

रचनाले फेसबुकमा लेखेकी छन् – सानैदेखि बाबाममिलाई एउटा घर बनाएर राख्ने सपना थियो, सांगितिक क्षेत्रबाटै यो सपना पुरा गर्छु भन्ने कल्पना नै थिएन तर हजुरहरु सबैको माया र आशिर्वादले गर्दा आज मेरो एउटा सपना पुरा भएको छ ❤️चन्द्रगडि झापामा पुरानो घर भएको ठाँउमा चार कोठे पक्कि घर निर्माण कार्य सकिएको छ, बाबाममि यहि घरमा बस्दै हुनुहुन्छ 🥰 माया, साथ, हौसला र आशिर्वाद दिनुहुने सबैमा नतमस्तक छु । सदैव यहि क्षेत्रमा रहि सत्कर्म गर्ने छु ।