गाँजा बोकेको पिकअप सहित २ जना पक्राउ

सुनसरी । सुनसरीको देवानगंज गाउँपालिका–६ बाट गाँजा बोकेको पिकप भ्यान सहित २ जनालाई प्रहरीले पक्राउ गरेको छ ।

इलाका प्रहरी कार्यालय देवानगंजबाट खटिएको गस्ती टोलीले हिजो राती साढे १० बजे राजगंज–सिनवारी–कप्तानगंजस्थित भित्री सडक खण्डमा को १ ज १६६१ नम्वरको अम्लिसोको कुचो बोकेको पिकअप गाडीलाई शंका लागि चेकजाँच गर्ने क्रममा कुचो भित्र लुकाई राखेको ३ सय ५० किलोग्राम (७ बोरा) गाँजा बरामद गरेको हो ।

गाँजा बरामद भएसंगै प्रहरीले गाडी चालक धरान–१६ सुनसरीका २७ बर्षीय पूर्णबहादुर राई र सहचालक बिजय राईलाई पक्राउ गरेको छ । पिकअप गाडी सहित पक्राउ परेका दुबै जनामाथि जिल्ला प्रहरी कार्यालय सुनसरीबाट थप अनुसन्धान भइरहेको प्रदेश प्रहरी कार्यालय विराटनगरले जनाएको छ ।