ब्राउन सुगर र नियन्त्रित औषधि सहित ४ जना पक्राउ

बिराटनगर । प्रहरीले झापा, मोरङ र सुनसरीका छुट्टाछुट्टै स्थानबाट प्रतिबन्धित लागूऔषध ब्राउन सुगर र नियन्त्रित औषधि सहित चार जनालाई पक्राउ गरेको छ ।

हिजो बिहान झापाको प्रहरी बिट मेचीपुलबाट खटिएको प्रहरी टोलीले चेक जाँचका क्रममा प्रदेश १–०१–०१३ प १९७३ नम्वरको स्कुटरमा भारतबाट नेपालतर्फ आउँदै गरेकी चुलाचुली गाउँपालिका–१ इलामकी ३४ बर्षीया मञ्जु चापागाईको साथबाट १६ ग्राम ८ सय मिलि ग्राम ब्राउन सुगर बरामद गरेको थियो ।

यसैगरी इलाका प्रहरी कार्यालय धरान सुनसरीबाट खटिएको प्रहरी टोलीले खोटाङको बाक्सिला घर भई धरान उपमहानगरपालिका–१५ मा डेरा गरी बस्दै आएका ४० बर्षीय जीवन राई र धरान–१५ का २६ बर्षीय रुकमान मगरलाई १ ग्राम २० मिलिग्राम ब्राउन सुगर सहित पक्राउ गरेको छ ।

यस्तै मोरङको कानेपोखरी गाउँपालिका–४ का १९ बर्षीय सञ्जय दर्जीलाई नियन्त्रित औषधि स्पासपेन ९९ चक्की र ट्रामाड्रोल १०४ चक्की सहित प्रहरी चौकी रमाइलो मोरङबाट खटिएको प्रहरी गस्ती टोलीले पक्राउ गरेको छ । पक्राउ परेकाहरुमाथि सम्बन्धित प्रहरी कार्यालयबाट थप अनुसन्धान भइरहेको प्रदेश प्रहरी कार्यालय विराटनगरले जनाएको छ ।