फिदिम । फिदिममा कोशी प्रदेशस्तरीय फोटो प्रदर्शनी आजबाट सुरु भएको छ ।
नेपाल फोटो पत्रकार महासंघ पाँचथर शाखाले आयोजना गरेको प्रदर्शनीमा कोशी प्रदेशका विभिन्न जिल्लाका फोटोग्राफरहरुले खिचेका ४८ वटा तस्वीरहरु राखिएका छन् । कला संस्कृति, पर्यटन र जैविक विविधतासँग सम्बन्धित तस्वीरहरु फिदिमको वीपी पार्कमा प्रदर्शनीमा रहेका छन् ।
प्रदर्शनीको आज आयोजित कार्यक्रममा फिदिम नगरपालिकाका नगर प्रमुख मित्रप्रसाद काफ्लेले उद्घाटन गर्नुभयो । पर्यटन कार्यालय झापाको आर्थिक सहयोगमा आयोजित प्रदर्शनीमा उत्कृष्ट तीन वटा फोटोलाई पुरस्कृत समेत गरिने आयोजकले जनाएको छ ।
प्रदर्शनीमा प्रथम, द्वितीय र तृतीय हुने तस्वीरले क्रमशः रु. २० हजार, १५ हजार र १० हजार पुरस्कार प्राप्त गर्ने नेपाल फोटो पत्रकार महासंघ पाँचथर शाखाका अध्यक्ष भवानी तावाले जानकारी दिनुभयो ।
पर्यटन प्रवद्र्धनको सबैभन्दा प्रभावकारी माध्यम फोटो भएकाले फोटो प्रदर्शनीमार्फत पर्यटन विकासमा टेवा पुग्ने अपेक्षासहित प्रदर्शनी आयोजना गरिएको आर्थिक सहयोग गर्ने निकाय पर्यटन कार्यालय झापाका प्रमुख छविलाल खतिवडाले जानकारी दिनुभयो । यसले फोटो पत्रकारिताको विकासमा समेत टेवा पुग्ने कार्यालय प्रमुख खतिवडाको भनाइ छ ।
प्रदर्शनी भोलिसम्म रहने आयोजकले जनाएको छ । प्रदर्शनीका लागि ३०० वटाभन्दा बढी तस्वीरहरु प्राप्त भएकामा नेपाल फोटो पत्रकार महासंघ केन्द्रीय समितिले बनाएको विज्ञहरुको छनौट समितिबाट ४८ वटा प्रदर्शनीका लागि सिफारिस भएका अध्यक्ष तावाले वताउनुभयो ।
प्रतिक्रिया