झापा । झापाको विभिन्न स्थानबाट लागूऔषध ब्राउनसुगर सहित प्रहरीले चार जनालाई पक्राउ गरेको छ ।
बुधवार दिउसो सँवा २ बजे वडा प्रहरी कार्यालय भद्रपुरबाट खटिएको प्रहरी टोलीले भद्रपुर नगरपालिका–३ झोलुङ्गे पुलबाट भारतबाट नेपालतर्फ आउँदै गरेको भारत पश्चिम बंगाल दार्जिलिङ थाना खुरीबारी भेलको जोत बस्ने ४२ बर्षीय निखिल विश्वासलाई ब्राउनसुगर ३ ग्राम ८०० मिलिग्राम सहित पक्राउ गरिएको छ ।
यसै गरी बुधवार बेलुका ७ बजे लागूऔषध नियन्त्रण ब्यूरो काँकडभिट्टा र इलाका प्रहरी कार्यालय अनारमनीबाट खटिएको प्रहरी टोलीले बिर्तामोड नगरपालिका–२ चारपानेबाट सोही स्थानका ३६ बर्षीय बद्री राजबंशीलाई ब्राउनसुगर ३ ग्राम सहित पक्राउ गरेको छ ।
यस्तै इलाका प्रहरी कार्यालय दमकबाट खटिएको प्रहरी टोलीले बुधवार राती ८ बजे झापाको दमक नगरपालिका–९ इटाभट्टाबाट को २९ प २२३४ नम्बरको मोटरसाइकलमा सवार रहेका गौरादह नगरपालिका–१ का ३३ बर्षीय भीमबहादुर श्रेष्ठ र ३२ बर्षीय मोहन सिलवाललाई ब्राउनसुगर २५ ग्राम र नगद १० हजार सहित पक्राउ गरेको छ ।
यसरी लागूऔषध ब्राउनसुगर सहित पक्राउ परेका चारै जनाको सम्बन्धमा थप अनुसन्धान भइरहेको जिल्ला प्रहरी कार्यालय झापाले जनाएको छ ।
प्रतिक्रिया