फिदिम । पाँचथरको फिदिम नगरपालिका–८ रानीटार घुमाउनेटारको एक घरमा गएराती आगलागी हुँदा दुई जनाको जलेर मृत्यु भएको छ भने दुई जना घाइते भएका छन् ।
घुमाउनेटारका मेघबहादुर गुरुङको ढुङ्गा, माटो, काठ र जस्तापाताले बनेको तीन तले घरमा गएराती अन्दाजी १ः३५ बजेबाट आगलागी हुँदा मेघबहादुरकी बुहारी २३ वर्षीया आसाङसिंह थेबे र २२ वर्षीया छोरी ममता गुरुङको जलेर मृत्यु भएको हो ।
आगलागीमा ५५ वर्षीय मेघबहादुर र ३५ वर्षीय बिजेन्द्र गुरुङ जलेर टाउको, हातखुट्टा लगायत अङ्गमा सामान्य जलेर सामान्य घाइते भएका छन् । उक्त घरमा सात जना सुतेकामा तीन जना भागेर बच्न सफल भएको जिल्ला प्रहरी कार्यालय पाँचथरले जनाएको छ ।
आगलागी नियन्त्रणका लागि फिदिमबाट दुई वटा दमकलसहित सुरक्षाकर्मीको टोली पुगेपनि घर पूर्ण रुपमा जलेको छ । आगलागीमा करीब रु. ५० लाखको क्षति भएको प्रारम्भिक अनुमान गरिएको प्रहरीले जनाएको छ ।
प्रहरीले आगलागीको कारण पत्ता नलागेको जनाएको छ । तर स्थानीयवासीले मध्यरात भएका कारण विद्युत सर्ट भई एक्कासी घरमा आगो लागेको हुनेसक्ने अनुमान गरेका छन् ।
प्रतिक्रिया