काठमाडौं । वर्तमान सरकार गठन हुँदा आफूले पाएको गृह मन्त्रालय नपाए सरकारबाट बाहिरिने तयारीमा राष्ट्रिय स्वतन्त्र पार्टी (रास्वपा) जुटेको छ ।
आइतबार नेपाली नागरिकता लिएपछि पुनः गृहमन्त्री बन्ने दौडधूपमा लागेका रास्वपाका सभापति रवि लामिछानेले मंगलबार बिहान प्रधानमन्त्री पुष्पकमल दाहाल ‘प्रचण्ड’लाई भेटेका थिए। भेटमा गृह मन्त्रालयका लागि प्रधानमन्त्री दाहाल सकारात्मक नभएपछि रास्वपाले सरकारबाट बाहिरिने तयारी थालेको रास्वपानिकट स्रोतको भनाई छ ।
स्रोतका अनुसार लामिछानेको नागरिकता विवादका कारण माओवादीका केही नेताहरु उनलाई पुनः गृहमन्त्रालय दिन तयार नभएको र बिहानको छलफलमा पनि माओवादी अध्यक्षसमेत रहेका प्रधानमन्त्री दाहाल सकारात्मक नदेखिएका हुन् । तर सरकारमा सहभागी सबैभन्दा ठूलो दल नेकपा (एमाले)का अध्यक्ष केपी शर्मा ओली भने रविलाई नै पुनः गृहमन्त्री बनाउन सहमत छन्।
गत मंसिर ४ गते सम्पन्न प्रतिनिधिसभा निर्वाचनमा २० सिट जितेको रास्वपाले सरकारमा सहभागी हुँदा उपप्रधान तथा गृह मन्त्रालयसहित चार मन्त्रालय पाएको हो। सर्वोच्च अदालतले माघ १३ गते शुक्रबार रविको नागरिकता अवैध भएको फैसला गरेपछि लामिछाने पद तथा जिम्मेवारीबाट बाहिरिएका थिए।
चितवन–२ बाट निर्वाचित लामिछानेको सांसद् पद खारेज भएपछि सो क्षेत्रमा उपनिर्वाचन हुँदैछ। रविले पुनः उम्मेदवारी दिने तयारी समेत थालिसकेका छन् । यद्यपि निर्वाचन आयोगले भने निर्वाचनको मिति निर्धारण गरेको छैन।
प्रतिक्रिया