लागूऔषध सहित ७ जना पक्राउ

विराटनगर । प्रहरीले झापा, मोरङ र उदयपुरकाछुट्टाछुट्टै स्थानबाट प्रतिबन्धित लागूऔषध ब्राउनसुगर र निषेधित औषधिसहित ७ जनालाई पक्राउ गरेको छ ।

लागूऔषध सहित पक्राउ झापाको बिर्तामोड नगरपालिका–९ का २२ बर्षीय अर्जुन आले र ३८ बर्षीय कृष्ण लिम्बूलाई इलाका प्रहरी कार्यालय अनारमनीबाट खटिएको प्रहरी टोलीले चेक जाँचको क्रममा १ ग्राम ब्राउनसुगर सहित पक्राउ गरेको थियो ।

यस्तै लागूऔषध नियन्त्रण ब्यूरो बिराटनगरबाट खटिएको प्रहरी टोलीले मोरङको बिराटनगर–१६ मा भारतबाट नेपालतर्फ शंकास्पद अवस्थामा आउँदै गरेका पैदलयात्री धरान–१३ का २० बर्षीय शुक्र भुजेल र २१ बर्षीय पवन अधिकारीलाई चेकजाँच गर्दा उनीहरुको साथबाट निषेधित औषधी लुपिजेसिक, एभिल, फेनारगन र डाइजोपाम १४० एम्पुल बरामद गरेको हो ।

यसै गरी उदयपुरको प्रहरी चौकी बसाहबाट खटिएको प्रहरी टोलीले चौदण्डीगढी नगरपालीका–४ मा चेकजाँचका क्रममा बेलका नगरपालिका–३ का २० बर्षीय बिशाल तामाङ, २४ बर्षीय प्रदीप तामाङ र २१ बर्षीय उमेश खत्रीलाई नाइट्राभेट ३२ ट्याव्लेट सहित पक्राउ गरेको हो । पक्राउ परेका सातै जनामाथि सम्बन्धित प्रहरी कार्यालयबाट थप अनुसन्धान भइरहेको प्रदेश प्रहरी कार्यालय विराटनगरले जनाएको छ ।