ब्राउन सुगर सहित ३ जना पक्राउ

झापा । झापाको दमक नगरपालिका–२ बाट प्रतिबन्धित लागूऔषध ब्राउन सुगर सहित ३ जनालाई प्रहरीले पक्राउ गरेको छ ।्

बिशेष सूचनाका आधारमा हिजो दिउँसो दमक–२ नयाँ आम्दा खरखरे टोलबाट लागूऔषध नियन्त्रण ब्यूरो काँकरभिट्टा र इलाका प्रहरी कार्यालय दमकबाट खटिएको प्रहरी टोलीले चेकजाँचको क्रममा १९ ग्राम ब्राउन सुगरसहित ३ जनालाई पक्राउ गरेको हो । पक्राउ पर्नेमा दमक–८ का ३७ बर्षीय तेजकुमार खवास, ३५ बर्षीय सुनिल श्रेष्ठ र दमक–२ का २२ बर्षीय बिजय धिमाल छन् ।

उनीहरुको साथबाट १९ ग्राम ब्राउन सुगर, नगद ९७ हजार ६ सय रुपैयाँ, ४ थान मोवायल र को २८ प ३१४६ नम्बरको स्कुटर, प्रदेश १–०२–०४८ प ६६५७, ज. १२ प ५५५७ नम्बरको मोटरसाइकल समेत प्रहरीले नियन्त्रणमा लिएको छ । पक्राउ परेका तीनै जनामाथि इलाका प्रहरी कार्यालय दमकबाट थप अनुसन्धान भइरहेको प्रहरीले जनाएको छ ।